കണ്ണൂര്, കാസര്കോട്, ഇടുക്കി ജില്ലകളില് ക്വാറികളുടെ പ്രവര്ത്തനത്തിന് നിരോധനം ഏര്പ്പെടുത്തി. കണ്ണൂരില് വിനോദസഞ്ചാര കേന്ദ്രങ്ങളിലേക്ക് മൂന്നുദിവസം പ്രവേശനമില്ല. കാസര്ഗോഡും വിനോദസഞ്ചാര കേന്ദ്രങ്ങളില് നിയന്ത്രണമുണ്ട്.
ബീച്ചിലും റാണിപുരം ഉള്പ്പെടെയുള്ള വിനോദസഞ്ചാര കേന്ദ്രങ്ങളിലുമാണ് നിയന്ത്രണം. മണ്ണിടിച്ചില്, ഉരുള്പൊട്ടല് സാധ്യതയുള്ള സ്ഥലങ്ങളില് ട്രക്കിങിന് നിരോധനം ഏര്പ്പെടുത്തിയിട്ടുണ്ട്.
ഇടുക്കിയില് കയാക്കിംഗ്, റാഫ്റ്റിംഗ്, കുട്ടവഞ്ചി, ട്രക്കിംഗ് എന്നിവ നിരോധിച്ചു. വയനാട്ടില് പുഴകളിലും വെള്ളക്കെട്ടുകളിലും ഇറങ്ങരുതെന്നും അത്യാവശ്യത്തിനല്ലാതെയുള്ള യാത്രകള് ഒഴിവാക്കണമെന്നും ജില്ലാ ഭരണകൂടം അറിയിച്ചു. മലയോര മേഖലകളില് മണ്ണിടിച്ചിലും ഉരുള്പൊട്ടലും ഉണ്ടാകാനുള്ള സാധ്യത കണക്കിലെടുത്ത് ജനങ്ങള് സുരക്ഷിത സ്ഥലങ്ങളിലേക്ക്
മാറണമെന്ന് അധികൃതര് നിര്ദേശിച്ചു. താഴ്ന്ന പ്രദേശങ്ങളില് വെള്ളക്കെട്ട് ഉണ്ടാകാമെന്നതിനാല്, ക്യാമ്പുകളിലേക്ക്
മാറാന് തയാറായി ഇരിക്കണം.
ശക്തമായ കാറ്റിന് സാധ്യതയുള്ളതിനാല് അടച്ചുറപ്പില്ലാത്ത വീടുകളില് താമസിക്കുന്നവര് പ്രത്യേക ജാഗ്രത പാലിക്കണം. നദികള് മുറിച്ചുകടക്കുക, നദികളില് കുളിക്കുക, മീന്പിടിക്കുക തുടങ്ങിയവ പൂര്ണമായും ഒഴിവാക്കണം. അനാവശ്യ യാത്രകള്, പ്രത്യേകിച്ച് വെള്ളച്ചാട്ടങ്ങളിലേക്കും മലയോര മേഖലകളിലേക്കുമുള്ള വിനോദ സഞ്ചാരം നിര്ത്തിവയ്ക്കണം. ജലാശയങ്ങളോട് ചേര്ന്ന റോഡുകളിലൂടെയുള്ള യാത്രകളിലും അറ്റകുറ്റപ്പണികള് നടക്കുന്ന റോഡുകളിലും ജാഗ്രത വേണം. തീരപ്രദേശങ്ങളില് കടലാക്രമണ സാധ്യതയുള്ളതിനാല് മത്സ്യബന്ധനോപാധികള് സുരക്ഷിതമാക്കുകയും അപകട മേഖലകളില് താമസിക്കുന്നവര് മാറിത്താമസിക്കുകയും വേണം.
