രാമനാട്ടുകര: ആംബുലന്‍സുകള്‍ ഗതാഗതക്കുരുക്കില്‍ അകപ്പെട്ട് ഗുരുതരാവസ്ഥയില്‍ ആശുപത്രിയിലേക്ക് കൊണ്ടുപോവുകയായിരുന്ന രണ്ട് രോഗികള്‍ മരിച്ചു. വള്ളിക്കുന്ന് അരിയല്ലൂര്‍ കോട്ടാശ്ശേരി സ്വദേശി ഷജില്‍കുമാര്‍ (49), എടരിക്കോട് കളത്തിങ്കല്‍ വീട്ടില്‍ സുലൈഖ (54) എന്നിവരുടെ ജീവനാണ് കഴിഞ്ഞദിവസം രാത്രി വഴിമധ്യേ പൊലിഞ്ഞത്. നിര്‍മാണത്തിലിരിക്കുന്ന പുതിയ ആറുവരിപ്പാതയില്‍ കാക്കഞ്ചേരിഭാഗത്താണ് ആംബുലന്‍സുകള്‍ ഗതാഗതക്കുരുക്കില്‍ അകപ്പെട്ടത്.
ചേളാരി ഡി.എം.എസ്. ആശുപത്രിയില്‍നിന്ന് ഷജില്‍കുമാറുമായി കോഴിക്കോട് മെഡിക്കല്‍കോളേജിലേക്ക് പോവുകയായിരുന്ന സാപ്റ്റ്‌കോ ആംബുലന്‍സും കോട്ടക്കല്‍ മിംസില്‍നിന്ന് സുലൈഖയുമായി വൈകീട്ട് 5.30ന് കോഴിക്കോട് ഇഖ്‌റ ആശുപത്രിയിലേക്ക് പുറപ്പെട്ട തെഹല്‍ക്ക ഐ.സി.യു. ആംബുലന്‍സുമാണ് അനിശ്ചിതമായി ഗതാഗതക്കുരുക്കില്‍പ്പെട്ടത്. സമയം വൈകിയതോടെ ഇരു ആംബുലന്‍സുകളിലെയും രോഗികളെ ഫറോക്ക് ചുങ്കം ക്രസന്റ് ആശുപത്രിയിലെത്തിച്ചെങ്കിലും ജീവന്‍ രക്ഷിക്കാനായില്ല.
