തലസ്ഥാനത്ത് രാവിലെ തുടങ്ങിയ അതിശക്ത മഴക്ക് ശമനമില്ല, റഡാർ ചിത്രം പ്രകാരം വരും മണിക്കൂറിൽ 7 ജില്ലകളിൽ മഴ തുടരും

തിരുവനന്തപുരം: തലസ്ഥാന ജില്ലയിലടക്കം രാവിലെ തുടങ്ങിയ അതിശക്ത മഴക്ക് രാത്രിയായിട്ടും ശമനമില്ല. കാലാവസ്ഥ കേന്ദ്രം നൽകുന്ന മുന്നറിയിപ്പ് പ്രകാരം വരും മണിക്കൂറുകളിലും തിരുവനന്തപുരം അടക്കമുള്ള 7 ജില്ലകളിൽ മഴ ശക്തമായി തുടരും. ഏറ്റവും പുതിയ റഡാർ ചിത്രം പ്രകാരം തിരുവനന്തപുരം, കൊല്ലം, കോട്ടയം, ഇടുക്കി, എറണാകുളം, തൃശ്ശൂർ, പാലക്കാട് ജില്ലകളിൽ അടുത്ത മൂന്ന് മണിക്കൂറിൽ ഒറ്റപ്പെട്ടയിടങ്ങളിൽ ഇടത്തരം മഴ തുടരുമെന്നാണ് 9 മണിയോടെ പുറത്തിറക്കിയ അറിയിപ്പിൽ കേന്ദ്ര കാലാവസ്ഥവകുപ്പ് നൽകുന്ന മുന്നറിയിപ്പ്. അതേസമയം തിരുവനന്തപുരം, കൊല്ലം ജില്ലകളിൽ ഓറഞ്ച് അലർട്ട് തുടരുകയാണ്. പത്തനംതിട്ട, ആലപ്പുഴ, കോട്ടയം, ഇടുക്കി, എറണാകുളം, തൃശൂർ ജില്ലകളിൽ യെല്ലോ അലർട്ടും തുടരുകയാണ്.