ഇന്ന് ലോക മാനസികാരോഗ്യദിനം. മാനസികാരോഗ്യത്തെക്കുറിച്ചുള്ള അവബോധം ഉണ്ടാക്കുന്നതിന് ലോകാരോഗ്യസംഘടനയുടെ നേതൃത്വത്തില്‍ എല്ലാ വര്‍ഷവും ഈ ദിനം ആചരിക്കുന്നു.ലോകമെമ്പാടും മാനസികാരോഗ്യപ്രശ്‌നങ്ങള്‍ അനുഭവിക്കുന്നവരുടെ എണ്ണം വര്‍ധിക്കുന്നുവെന്ന് പഠനങ്ങള്‍ സൂചിപ്പിക്കുന്നു. വ്യക്തിജീവിതത്തിലും തൊഴിലിടങ്ങളും നേരിടുന്ന പ്രതിസന്ധികളും വെല്ലുവിളികളും മാനസികാരോഗ്യം തകരാറിലാക്കുന്നു.
ഇന്ത്യയില്‍ തൊഴിലിടങ്ങളില്‍ പതിനെട്ടിനും അറുപത്തിനാലിനും ഇടയില്‍ പ്രായമുള്ളവരില്‍
നിരാശയും പിരിമുറുക്കവും അനുഭവിക്കുന്നവരുടെ നിരക്ക് ഓരോ വര്‍ഷവും കൂടിവരുന്നു. 2015-16ല്‍ നിംഹാന്‍സ് സര്‍വേ അനുസരിച്ച് രാജ്യത്ത് 150 ദശലക്ഷം ആളുകള്‍ മാനസികപ്രശ്‌നങ്ങള്‍ അനുഭവിക്കുന്നു. 2020ല്‍ ഗ്ലോബല്‍ ബര്‍ഡന്‍ ഓഫ് ഡിസീസ് സ്റ്റഡി നടത്തിയ റിപ്പോര്‍ട്ടില്‍ 197ദശലക്ഷം പേര്‍ ഇത്തരം പ്രശ്‌നങ്ങള്‍ നേരിടുന്നതായി കണ്ടെത്തി. 5 വര്‍ഷം കൊണ്ട് ഏകദേശം നാല് ശതമാനത്തിന്റെ വര്‍ധന.
മനസിനുണ്ടാകുന്ന പ്രശ്‌നങ്ങള്‍ തിരിച്ചറിയുന്നതിനും ചികിത്സതേടേണ്ടതിന്റേയും പ്രാധാന്യം എന്തെന്ന് തിരിച്ചറിയാത്തവരാണ് പലരും. ബോധവല്‍ക്കരണത്തിലൂടെ ഈ പ്രശ്‌നം പരിഹരിക്കുകയാണ് ലക്ഷ്യം. തൊഴിലിടങ്ങളില്‍ മാനസികാരോഗ്യത്തിന് മുന്‍ഗണന നല്‍കുക എന്നതാണ് ഇത്തവണത്തെ പ്രമേയം.
