തൃശൂരിലെ എടിഎം കൊള്ള; കവർച്ചക്കാർ തമിഴ്‌നാട്ടിൽ പിടിയിൽ, പോലീസുമായുള്ള ഏറ്റുമുട്ടലിൽ ഒരാൾ കൊല്ലപ്പെട്ടു
തൃശൂർ: ജില്ലയിലെ മൂന്നിടത്തെ എടിഎമ്മുകളിൽ നിന്നായി ലക്ഷങ്ങളുടെ കവർച്ച നടത്തിയ സംഘം തമിഴ്‌നാട്ടിൽ പിടിയിൽ. ഹരിയാന സ്വദേശികളായ ഇവരെ നാമക്കലിൽ വച്ചാണ് തമിഴ്‌നാട് പോലീസ് പിടികൂടിയത്. പ്രതികളും പോലീസും തമ്മിലുണ്ടായ ഏറ്റുമുട്ടലിൽ ഒരാൾ കൊല്ലപ്പെട്ടു. ഇവരെ പിന്തുടർന്ന് എത്തിയ പോലീസിനെ കവർച്ചക്കാർ ആക്രമിച്ചുവെന്നാണ് ലഭ്യമായ വിവരം. ഇതോടെ പോലീസ് വെടിയുതിർക്കുകയായിരുന്നു.
കൊള്ളസംഘത്തിൽ ആറ് പേരാണ് ഉണ്ടായിരുന്നത്. ഇവർ മോഷ്‌ടിച്ച പണം കണ്ടെയ്‌നറിൽ കടത്തുകയായിരുന്നു എന്നാണ് സൂചന. ഏറ്റുമുട്ടലിൽ കൊള്ളസംഘത്തിലെ ഒരാൾക്ക് വെടിയേറ്റിട്ടുണ്ട്. രണ്ട് പോലീസുകാർക്കും പരിക്കുണ്ടെന്നാണ് ലഭ്യമായ വിവരം. മോഷണത്തിന് വേണ്ടി ഉപയോഗിച്ചുവെന്ന് കരുതുന്ന കാർ ഉൾപ്പെടെ കണ്ടെയ്‌നറിൽ കടത്തിയായിരുന്നു ഇവരുടെ യാത്ര.
എന്നാൽ പ്രതികളുടെ കൈവശം തോക്ക് ഉൾപ്പെടെയുള്ള മാരകായുധങ്ങൾ ഉണ്ടായിരുന്നുവെന്നാണ് സൂചന. പോലീസ് വളഞ്ഞതോടെയാണ് വെടിവെപ്പ് നടന്നത്. പിടിച്ചെടുത്ത കണ്ടെയ്‌നറിൽ പണം കെട്ടുകെട്ടായി സൂക്ഷിച്ച നിലയിലാണ് ഉണ്ടായിരുന്നത്. തമിഴ്‌നാട് പൊലീസിലെ ഇൻസ്‌പെക്‌ടർ തവമണി, രഞ്ജിത് കുമാർ എന്നിവർക്കാണ് പരിക്കേറ്റത്
