പാര്ലമെന്റ് പാസ്സാക്കിയ വഖഫ് ഭേദഗതി നിയമം ഇന്ന് മുതല് പ്രാബല്യത്തില്. കേന്ദ്ര ന്യൂനപക്ഷ ക്ഷേമ മന്ത്രാലയം ഇതുമായി ബന്ധപ്പെട്ട് വിജ്ഞാപനമിറക്കി. നിയമം നടപ്പാക്കുന്നതിനുള്ള ചട്ടങ്ങള് ഉടന് രൂപികരിക്കുമെന്നും സര്ക്കാര് വൃത്തങ്ങള് അറിയിച്ചു.
ലോക്സഭയും രാജ്യസഭയും പാസാക്കിയ ബില്ലിന് രാഷ്ട്രപതി ദ്രൗപദി മുര്മു അംഗീകാരം നല്കിയിരുന്നു. ബില്ലിന്മേല് ലോകസ്ഭയില് 14 മണിക്കൂര് നീണ്ട ചര്ച്ചയും രാജ്യസഭയില് 17 മണിക്കൂറും നീണ്ട ചര്ച്ചകളും നടന്നു. ലോക്സഭയില് 288 പേര് ബില്ലിനെ അനുകൂലിച്ചപ്പോള് 232 പേര് എതിര്ത്തു. ആകെ 520 പേരാണ് വോട്ട് ചെയ്തത്. രാജ്യസഭയിലെ വോട്ടെടുപ്പില് 128 പേര് ബില്ലിനെ അനുകൂലിച്ച് വോട്ടു ചെയ്തു. 95 എംപിമാര് എതിര്ത്തു.
