മുഖ്യമന്ത്രി പിണറായി വിജയൻ ദില്ലിയിലേക്ക്; പ്രധാനമന്ത്രിയുമായി നിർണായക ചർച്ച വെള്ളിയാഴ്ച, അമിത് ഷായുമായി നാളെ

തിരുവനന്തപുരം: വയനാടിന്റെ പുനർനിർമ്മാണവും കേരളത്തിലെ അതിപ്രധാന പദ്ധതികളുമായുള്ള ചർച്ചകൾക്കായി മുഖ്യമന്ത്രി പിണറായി വിജയൻ ദില്ലിയിലേക്ക് യാത്ര തിരിച്ചു. പ്രധാനമന്ത്രിയുമായുള്ള കൂടിക്കാഴ്ച വെള്ളിയാഴ്ച നടക്കും, നാളെ കേന്ദ്ര ആഭ്യന്തരമന്ത്രി അമിത് ഷായുമായും മുഖ്യമന്ത്രിയുടെ ചർച്ച ഉണ്ടാകും. മന്ത്രിമാരായ കെ. എൻ. ബാലഗോപാൽ, മുഹമ്മദ് റിയാസ്, ചീഫ് സെക്രട്ടറി എന്നിവർ മുഖ്യമന്ത്രിയോടൊപ്പം ദില്ലിയിലുണ്ടാകും. ചർച്ചയിൽ വയനാടിന് കൂടുതൽ കേന്ദ്ര സഹായം, കേരളത്തിലെ എയിംസ് പദ്ധതി ഉൾപ്പെടെയുള്ള അതിപ്രധാന വിഷയങ്ങൾ പ്രധാനമന്ത്രിയും ആഭ്യന്തര മന്ത്രിയുമായുള്ള ചർച്ചയിൽ മുഖ്യമന്ത്രി ഉന്നയിക്കും.

വയനാട് ഉരുൾപൊട്ടൽ ദുരന്തത്തിൽ തകർന്ന പ്രദേശങ്ങളുടെ പുനർനിർമ്മാണത്തിന് കേന്ദ്രം ഒക്ടോബർ 1-ന് പ്രഖ്യാപിച്ച 260.56 കോടി രൂപയുടെ സഹായം, കേരളം ആവശ്യപ്പെട്ട 2221 കോടിയിൽ നിന്ന് വളരെ കുറവാണ്. കേന്ദ്ര ആഭ്യന്തര മന്ത്രി അമിത് ഷാ തലവനായുള്ള ഉന്നതാധികാര സമിതി ദേശീയ ദുരന്ത ലഘൂകരണ നിധിയിൽ നിന്നാണ് തുക അനുവദിച്ചത്. കഴിഞ്ഞ വർഷം ജൂലൈയിൽ മുണ്ടക്കൈ, ചൂരൽമല മേഖലകളിലെ ദുരന്തത്തിന് നൽകിയ സഹായമാണ് ഇത്. മറ്റു സംസ്ഥാനങ്ങളുമായി താരതമ്യം ചെയ്യുമ്പോൾ, 2022-ൽ അസമിന് മണ്ണിടിച്ചിൽ ദുരന്തത്തിനായി 1270.788 കോടി രൂപ കേന്ദ്രം അനുവദിച്ചത് ശ്രദ്ധേയമാണ്.

ഇപ്പോൾ അനുവദിച്ച തുക ആവശ്യപ്പെട്ട തുകയുടെ വെറും 11 ശതമാനമാണ്, ദുരന്തം നടന്നതിന് 14 മാസങ്ങൾക്ക് ശേഷമാണ് പ്രത്യേക ധനസഹായം ലഭിക്കുന്നത്. മുമ്പ് കേരളത്തിന്‍റെ ദുരന്തനിവാരണ പ്രവർത്തനങ്ങൾക്ക് വായ്പ രൂപത്തിൽ 529.50 കോടി, ജൂലൈയിൽ 153 കോടി അനുവദിച്ചിരുന്നു. ഇത്തരത്തിൽ കേന്ദ്ര സഹായം കുറഞ്ഞതിനെ തുടർന്ന് വയനാടിന്‍റെ പുനർനിർമ്മാണത്തിന് വലിയ തോതിലുള്ള ധനസഹായം വേണമെന്ന് മുഖ്യമന്ത്രി പിണറായി വിജയൻ പ്രധാനമന്ത്രി നരേന്ദ്രമോദിയേയും ആഭ്യന്തരമന്ത്രി അമിത് ഷായേയും നേരിട്ട് അറിയിക്കുമെന്നാണ് പ്രതീക്ഷിക്കപ്പെടുന്നത്.