ക്ലാസ് മുറികളില്നിന്ന് ‘പിന്ബെഞ്ചുകാര്’ എന്ന സങ്കല്പ്പം ഒഴിവാക്കാന് ആഗ്രഹിക്കുന്നുവെന്ന് മന്ത്രി വി. ശിവന്കുട്ടി
തിരുവനന്തപുരം: സ്കൂള് ക്ലാസ് മുറികളില്നിന്ന് ‘പിന്ബെഞ്ചുകാര്’ എന്ന സങ്കല്പ്പം ഒഴിവാക്കാന് ആഗ്രഹിക്കുന്നുവെന്ന് വിദ്യാഭ്യാസ മന്ത്രി വി. ശിവന്കുട്ടി. ഫേസ്ബുക്കിലൂടെ മന്ത്രി ഈ ആശയം മുന്നോട്ടുവച്ചത്.
‘പിന്ബെഞ്ചുകാര്’ എന്ന സങ്കല്പം വിദ്യാര്ത്ഥിയുടെ ആത്മവിശ്വാസത്തെയും പഠനത്തെയും പ്രതികൂലമായി ബാധിക്കാന് സാധ്യതയുണ്ട്. ഒരു കുട്ടിയും പഠനത്തിലോ ജീവിതത്തിലോ പിന്നോട്ട് പോകാന് പാടില്ല. എല്ലാ കുട്ടികള്ക്കും തുല്യ അവസരങ്ങള് ഉറപ്പാക്കുക എന്നതാണ് ലക്ഷ്യം. ഇത് എങ്ങനെ പ്രാവര്ത്തികമാക്കാം എന്നതിനെക്കുറിച്ച് നമ്മള് ആലോചിക്കുന്നു.
പിന്ബെഞ്ചുകാര് എന്ന ആശയം ഇല്ലാതാക്കാന് പല രാജ്യങ്ങളും പല മാതൃകകളും പിന്തുടരുന്നുണ്ട്. നമ്മുടെ വിദ്യാഭ്യാസരീതിക്ക് അനുയോജ്യമായ ഏറ്റവും മികച്ച മാതൃക കണ്ടെത്താന് വിദഗ്ധരുടെ ഒരു സമിതിയെ നിയോഗിക്കാന് തീരുമാനിച്ചു. ഈ സമിതിയുടെ നിര്ദ്ദേശങ്ങള് പരിഗണിച്ച് നമുക്ക് മുന്നോട്ട് പോകാം. നമ്മുടെ കുട്ടികളുടെ മികച്ച ഭാവിക്കായി നിങ്ങളുടെ എല്ലാവിധ പിന്തുണയും തേടുന്നുവെന്നും മന്ത്രി കുറിപ്പില് പറയുന്നു.
