എസ്.എസ്.എല്.സി, പ്ലസ് ടു പൊതുപരീക്ഷകള് ഇന്ന് അവസാനിക്കും; പരീക്ഷ കഴിഞ്ഞാല് ഉടന് തന്നെ കുട്ടികളെ വീട്ടിലേക്ക് കൊണ്ടുപോകാണം; പരീക്ഷ കഴിഞ്ഞ് ആഘോഷങ്ങള് നടത്താന് അനുവദിക്കില്ല; സ്കൂളുകളില് അക്രമസംഭവങ്ങള് ഒഴിവാക്കുന്നതിന് കര്ശന നിയന്ത്രണം ഏര്പ്പെടുത്തി വിദ്യാഭ്യാസ വകുപ്പ്
തിരുവനന്തപുരം: സംസ്ഥാനത്ത് എസ്.എസ്.എല്.സി, പ്ലസ് ടു പൊതുപരീക്ഷകള് ഇന്ന് അവസാനിക്കും. ഒമ്പതാം ക്ലാസും പ്ലസ് വണ് ക്ലാസുകളുടെ പരീക്ഷ നാളെയാണ് അവസാനിക്കുന്നത്. എസ്.എസ്.എല്.സി, പ്ലടു പരീക്ഷകളുടെ പേപ്പര് വാലുവേഷന് ഏപ്രില് മൂന്നിന് ആരംഭിക്കും.
അതേസമയം, പരീക്ഷകള് അവസാനിക്കുന്ന ദിനമായതിനാല് സ്കൂളുകളില് അക്രമസംഭവങ്ങള് ഒഴിവാക്കുന്നതിന് കര്ശന നിയന്ത്രണങ്ങള് നടപ്പാക്കുമെന്ന് വിദ്യാഭ്യാസ വകുപ്പ് അറിയിച്ചിട്ടുണ്ട്. പരീക്ഷകള് കഴിഞ്ഞ് വിദ്യാര്ത്ഥികള് നടത്തുന്ന ആഘോഷങ്ങള് നിയന്ത്രിക്കാന് പ്രത്യേക നിര്ദ്ദേശം വിദ്യാഭ്യാസ വകുപ്പിന്റെ ഭാഗത്ത് നിന്ന് വന്നിട്ടുള്ളത്. സ്കൂള് പ്രധാനാധ്യാപകര്ക്ക് ഇതിനോടകം തന്നെ ഉത്തരവ് കൈമാറിയിട്ടുണ്ട്.
വിദ്യാര്ത്ഥി അക്രമങ്ങള് തടയുന്നതിനായി എല്ലാ സ്കൂള് പരിസരങ്ങളിലും പോലീസ് നിരീക്ഷണം ശക്തമാക്കിയിട്ടുണ്ട്. തോന്നിയാല് വിദ്യാര്ത്ഥികളുടെ സ്കൂള് ബാഗുകള് പരിശോധിക്കാനുള്ള അധികാരവും അധ്യാപകര്ക്ക് നല്കിയിട്ടുണ്ട്. പരീക്ഷ കഴിഞ്ഞ ഉടന് രക്ഷിതാക്കള് കുട്ടികളെ വീട്ടിലേക്ക് കൊണ്ടുപോകണമെന്ന നിര്ദേശം ഉള്പ്പെടെ നല്കിയിട്ടുണ്ട്.
വിദ്യാര്ത്ഥികള് വാഹനപ്രകടനങ്ങള് നടത്തുന്നത് അനുവദിക്കില്ലെന്നും, ആവശ്യമായ സ്ഥലങ്ങളില് പോലീസ് സാന്നിധ്യം ഉറപ്പുവരുത്തുമെന്നും വിദ്യാഭ്യാസ മന്ത്രി വി. ശിവന്കുട്ടി വ്യക്തമാക്കി. ലഹരി ഉപയോഗത്തിനെതിരായ ബോധവത്കരണവും ശക്തിപ്പെടുത്തുമെന്നും വിദ്യാര്ത്ഥികള്ക്ക് ലഹരി പദാര്ത്ഥങ്ങള് ലഭിക്കുന്ന സാഹചര്യം അവസാനിപ്പിക്കാന് പ്രത്യേക നടപടി സ്വീകരിക്കുമെന്നും മന്ത്രി വ്യക്തമാക്കി.
വിദ്യാഭ്യാസ ഓഫീസര്മാരുടെ യോഗത്തില് ഇതുമായി ബന്ധപ്പെട്ട പ്രത്യേക നിര്ദേശങ്ങള് മന്ത്രി നല്കിയിട്ടുണ്ട്. വിദ്യാര്ത്ഥികളുടെ സുരക്ഷയ്ക്കായി വിദ്യാഭ്യാസ വകുപ്പും പൊലീസ് വകുപ്പും ചേര്ന്ന് കാര്യക്ഷമമായ നിരീക്ഷണവും നിയന്ത്രണങ്ങളും ഉണ്ടാകുമെന്ന് അധികൃതര് അറിയിച്ചു.
